梅窩隱世小島沙舟
又係假日本地遊系列，今日約去梅窩，中環站一出已經迫到痴線，仲諗緊星期日做乜要出街，陣間去郊遊一定勁多人😵 點知去到目的地萬角咀呢個咁適合打卡嘅地方竟然一個人都冇，由落船行到終點來回都冇乜見到人，哈哈咁就等我介紹吓啦！
路線方面都冇乜好講，喺梅窩落咗船之後經過銀礦灣沙灘一路入，跟住Google Maps條山路就冇走雞，全程一個鐘左右，有上有落但唔算太辛苦。我哋喺中環搭 09:40 班快船，10:10 就到梅窩，先去一間外國人開嘅文青Cafe食早餐，之後就出發，經過沙灘嘅時候又係一個人都冇，勁正！
講返個沙洲，佢個名叫萬角咀，潮退嘅時候應該可以着鞋行過去，不過今日去到係潮漲，超級想打卡嘅我結果都係除鞋赤腳走過去。個水底係全部都係蠔殼，超級勁拮，好在一來一回都冇拮親隻腳。大家如果有機會去嘅話記得着返對防水鞋，又或者睇清楚幾時潮退先去。
沿途風景都好靚嘅，最緊要係空氣清新又冇乜人，中間會經過少少民居，咁盡量唔好騷擾到居民啦。途中聽到把女人聲喺度同我哋打招呼，又Hello又bye bye，但係我哋點都見唔到個女人喺邊，最後發現原來係民居入面嘅一隻鸚鵡！
回程上斜嘅路就比較少，好輕鬆一個鐘以內已經返番到碼頭附近，又再搵另外一間文青Cafe食少少野就搭船。今日嘅行程冇難度景色又靚又減壓，大家下個weekend可以考慮吓！
www.instagram.com/hyatt.hkg
Search